Чилийн Төрийн өмчит “Codelco” компанийн “Radomiro Tomic” зэсийн уурхайд осол гарч, нэг ажилтан амиа алдсаныг зохицуулах байгууллагаас пүрэв гарагт мэдээллээ.

“Codelco” ослын улмаас механикч амиа алдсан тул осол гарсан хүдэр бутлах болон материал дамжуулах хэсгийн үйл ажиллагааг түр зогсоосноо мэдэгдсэн байна.

Сүүлийн саруудад Чилийн томоохон уурхайнууд дараалан хүний амь эрсэдсэн осол гарсан нь дэлхийн тэргүүлэх зэс олборлогч улсыг хөдөлмөрийн аюулгүй байдалд дахин анхаарлаа хандуулахад хүргэж буй. Хамгийн сүүлд л гэхэд есдүгээр сарын 26-нд “BHP”-ийн “Escondida” уурхайд засвар үйлчилгээ хийж байсан нэг ажилтан амиа алдсан юм.

Чилийн зэсийн үйлдвэрлэл наймдугаар сард сүүлийн 15 гаруй жилийн доод түвшинд хүрсэн бөгөөд тус улсын олборлолтын уналт нь дэлхийн зах зээлд нийлүүлэлт хумигдаж, зэсийн үнэ түүхэн дээд түвшинд хүрэхэд нөлөөлж байна.

Наймдугаар сард зэсийн гарц өмнөх оны мөн үеэс 13 хувиар буурч, 369.5 мянган тонн болсныг Чилийн Үндэсний статистикийн хүрээлэн мэдээллээ. Энэ нь 2011 оны хоёрдугаар сараас хойших сарын хамгийн бага үзүүлэлт болж байна.

Зэсийн үнэ өндөр түвшинд хадгалагдаж, салбарт олон тэрбум ам.долларын хөрөнгө оруулалт хийсэн ч Чилийн олборлолт өмнөх оргил түвшиндээ эргэн хүрч чадахгүй олон жил үргэлжилж байгаа юм.