Австралийн Хөрөнгийн биржид бүртгэлтэй “Jade Gas Holdings” компани Тавантолгойн орд дахь “Улаан нуур” нүүрсний давхаргын метан хийн төслийн хүрээнд хэвтээ чиглэлийн гурав дахь олборлолтын цооногоо өрөмдөж эхэлснийг “Mongolian Mining Journal” мэдээллээ.

Энэхүү цооног нь Монгол Улсын хэмжээнд туршиж буй анхны олон салаа цооног гэдгийг онцолж байна.  Өрөмдлөгийг 3700 метр орчимд хийх ба нөөцийн давхаргатай харилцах талбайг хамгийн боломжит дээд хэмжээгээр тэлж, цооногийн сорох бүсийг нэмэгдүүлснээр хийн олборлолтын хэмжээ болон урсгалын хурдыг ахиулах зорилготойг тодотгосон байна.

Дээрх ажлыг энэ оны 11 дүгээр сарын эцэст багтаан дуусгахаар төлөвлөж байгаа аж. Тус цооногийн техникийн мэдээлэл нь цаашдын цооногийн бүтцийг оновчлохын зэрэгцээ 2027 онд хэрэгжүүлэх олборлолтын томоохон өрөмдлөгийн хөтөлбөрийн техникийн бэлтгэлийг хангахад чухал ач холбогдолтойг дурдаж байна.

Үүнээс гадна “Улаан нуур” төслийн I шатны хүрээнд нийт 175 олборлолтын цооног барихад шаардлагатай БНХАУ-ын талтай хийх 762.5 сая ам.долларын хөрөнгө оруулалтын хэлэлцээ эцсийн шатандаа орсныг мэдээллээ.