(Bloomberg) -- АНУ-ын Ерөнхийлөгч Дональд Трамп, Тэргүүн хатагтай Меланиа Трамп нар БНХАУ-ын Ерөнхийлөгч Ши Жиньпин болон Тэргүүн хатагтай Пэн Лиюанийг Цагаан ордонд хүлээн авч уулзлаа. Үүнээс өмнө талууд албан ёсны уулзалт хийж, хоёр улсад тулгараад буй сорилтуудыг шийдвэрлэхэд асар том ахиц гарсныг Дональд Трамп онцолжээ.

Дональд Трамп, Ши Жиньпин нар дээд хэмжээний уулзалтаараа эн тэргүүнд хиймэл оюуны салбар дахь ширүүн өрсөлдөөнийг хөндсөн байна. Дональд Трамп тэрхүү өрсөлдөөнд АНУ-ын давуу талыг хадгалахын тулд хиймэл оюуныг ямар нэгэн хязгаарлалтгүйгээр хөгжүүлэх хэрэгтэй гэсэн байр суурь дээрээ бат зогсохоо тодотгожээ.

Харин Ши Жиньпиний хувьд эсрэгээрээ зарим нэг зааг хязгаарлалт тогтооход бэлэн байгаагаа илэрхийлсэн байна. Тэрбээр хоёр улсад хиймэл оюуныг сайн сайхны төлөө хөгжүүлж, өсөлтийг нь хүний хяналт дор байлгах чадвар, үүрэг хариуцлага байгааг онцоллоо. Мөн Ши Жиньпин АНУ-ын хагас дамжуулагч болон бусад эд ангид тавьсан экспортын хязгаарлалт нь БНХАУ-ын компаниудын өсөлтийг боомилж байгааг шүүмжилжээ.

Мөн БНХАУ-ын Төрийн тэргүүн АНУ-ыг Тайванийн тусгаар тогтнолыг "эсэргүүцэх"-ийг уриалсан талаар “Xinhua” агентлаг мэдээлсэн байна. Энэ нь Вашингтоныг тус арлын талаар олон жил баримталж ирсэн байр сууриа өөрчлөхийг ил тод шахсан анхны тохиолдол болж байна.

Төрийн тэргүүнүүдийн дээд хэмжээний уулзалт дууссанаар Цагаан ордонд хүндэтгэлийн оройг  зоог барьсан бөгөөд энэ үеэр Ши Жиньпин хэлсэн үгэндээ "Бид БНХАУ, АНУ-ын хооронд стратегийн тогтвортой байдлыг хангах, үр дүнтэй харилцааг хөгжүүлэхээр тохиролцлоо" гэж мэдэгджээ.

Дээрх арга хэмжээнд “Meta Platforms”-ийн Гүйцэтгэх захирал Марк Закерберг, “Tesla”-ийн Гүйцэтгэх захирал Илон Маск, “Nvidia”-ийн Гүйцэтгэх захирал Женсен Хуан тэргүүтэй АНУ-ын технологийн салбарын удирдлагууд оролцсон байна.