(Bloomberg) -- Наймдугаар сард АНУ-ын суурь инфляц таамагласнаас хурдацтай эрчимжсэн нь Холбооны Нөөцийн банк энэ долоо хоногт болох хурлаараа бодлогын хүүг өсгөх магадлалыг нэмэгдүүллээ.

Өнгөрсөн сард хүнс, эрчим хүчний бүлгийг хасаж тооцсон хэрэглээний үнийн суурь индекс өмнөх сараас 0.3 хувиар өссөн нь “Bloomberg”-ийн судалгаанд хамрагдсан шинжээчдийн дундаж таамаг болох 0.2 хувийн өсөлтийг давжээ. Харин жилийн дүнгээр суурь инфляц 2.4 хувьтай гарсан байна.

Үүнд утасгүй үүрэн холбооны үйлчилгээний үнийн өсөлтийн улмаас эрчим хүч болон орон сууцны түрээсийг хасаж тооцсон үйлчилгээний үнэ 0.5 хувиар өссөн нь гол жин даржээ.

Статистик мэдээллээр Ираны дайн, тариф, дата төвийн бүтээн байгуулалтын нөлөөгөөр АНУ-ын инфляц Холбооны Нөөцийн банкны зорилтот түвшин рүү буурч байгаа гэсэн төлөв ажиглагдаагүй байна.

Ингэснээр фьючерсийн зах зээлд хөрөнгө оруулагчид Төв банк дараагийн хурлаараа бодлогын хүүгээ өсгөх нь бараг тодорхой болсон гэж үзэж байгаа аж. Мөн энэ он дуусахаас өмнө дахин нэг удаа хүүг өсгөх өндөр магадлалтай гэж таамаглаж байна.

Энэ долоо хоногт “Их 7"-ийн бүлгийн орнуудын гол Төв банкнуудын хувьд шийдвэрлэх үе тохиож буй. Лхагва гарагт Холбооны Нөөцийн банкаар эхэлж, араас нь Их Британи болон Японы Төв банкнууд мөнгөний бодлогын шийдвэрээ танилцуулна.

Дээрх гурван Төв банкны шийдвэр нь 2026 он дуустал болон цаашдын олон улсын мөнгөний бодлогын төлөв байдлыг тодорхойлох юм.