(Bloomberg) -- Израилын зэвсэгт хүчин Ираны дэмжлэгтэй “Хезболла” бүлэглэлтэй хийж буй дайны хүрээнд хуурай замын цэргээ Ливаны нутаг дэвсгэрийн гүн рүү оруулж байгаагаа мэдээллээ.

Түүнчлэн Израилын Ерөнхий сайд Биньямин Нетаньяху Батлан хамгаалахын сайд болон цэргийн дээд албан тушаалтнуудтай уулзсаныхаа дараа Ливанд хийх ажиллагаагаа өргөжүүлнэ гэж мэдэгдсэн байна.

Мягмар гарагт л гэхэд Израилын арми Ливаны өмнөд бүс нутаг дахь “Хезболла” бүлэглэлийн зэвсгийн агуулах, удирдлагын төв, ажиглалтын цэг зэрэг 100 гаруй байгууламжийг бөмбөгдсөний улмаас 12 иргэн амиа алджээ.

Үүнээс гадна АНУ-ын Ерөнхийлөгч Дональд Трамп Ирантай хийж буй яриа хэлэлцээ ахицтай байгааг мэдээлснээс хэдхэн цагийн дараа АНУ болон Иран Ормузын хоолойн орчимд харилцан гал нээсэн юм.