(Bloomberg) -- АНУ-ын эм, эмийн бүтээгдэхүүний “Eli Lilly & Co” БНХАУ дахь үйлдвэрлэлээ өргөжүүлэхээр ирэх 10 жилийн хугацаанд гурван тэрбум ам.долларын хөрөнгө оруулахаа зарлалаа.

Тус компани АНУ-д эрчимтэй хөгжиж буй таргалалтын эсрэг эмийн зах зээлд ноёрхлоо бэхжүүлэхийг зорьж байгаа юм. Тиймээс дээрх санхүүжилтийн дийлэнх хувийг БНХАУ-ын зохицуулагч байгууллагаас шалгаж буй орфорглипрон тураах эмийн үйлдвэрлэлд зарцуулах аж. Энэ хүрээнд “Pharmaron Beijing Pharmaceutical” зэрэг орон нутгийн компаниудтай хамтран ажиллахаар төлөвлөжээ.

“Eli Lilly” нь эрчимтэй хөгжиж буй БНХАУ-ын эмийн судалгаа, хөгжүүлэлт, үйлдвэрлэлийн дэд бүтцийг ашиглахын зэрэгцээ тус зах зээлд нэвтрэхийг зорьж байгаа АНУ-ын эм үйлдвэрлэгчдийн нэг юм. 

Тус компани БНХАУ-д нийт зургаа орчим тэрбум ам.долларын хөрөнгө оруулаад байгаа аж. Үүнтэй харьцуулахад “Eli Lilly”-ийн өрсөлдөгч “AstraZeneca” компани БНХАУ-д 2030 он хүртэл 15 тэрбум ам.долларын хөрөнгө оруулахаа амлаад байгаа юм.