Монгол Улсын эдийн засгийн өсөлт болон ажилгүйдлийн түвшин харилцан хамаарал бага байна гэж Нээлттэй нийгэм форум үзэж байна. Энэ нь Монгол Улсын эдийн засгийн дөрөвний нэгийг бүрдүүлж буй уул уурхайн салбар нь ажиллах хүч бага шингээж байгаатай холбоотой гэдгийг тодотголоо. Түүнчлэн бүтцийн ажилгүйдэл өндөр байгааг онцлов.

Улсын хэмжээнд ажилгүйдлийн түвшин 2022 онд 6.7 хувьд хүрч буурсан ч бусад улстай харьцуулахад өндөр байгаа юм. Нөгөө талаас сүүлийн таван жилд халамжийн зардал 3.2 дахин өссөн байна. Хэдий тийм боловч 2023 оны гуравдугаар сарын нийгмийн халамжийн сангийн зарцуулалтын тайланг харвал ядууралд өртсөн, амьжиргааны баталгаажих түвшнээс доогуур орлоготой иргэдэд зориулсан зардалд нийт зардлын нэг хувь ногдож байгаа аж.

Эдийн засгийн эерэг өөрчлөлтөөс шалтгаалсан орлогын эх үүсвэрээс хүүхдийн мөнгөн тусламж зэрэг халамжийн шинжтэй зарим хөтөлбөрийг хавтгайруулан хэрэгжүүлсэн нь төсвийн мөнгийг үр ашиггүй зарцуулах үндэс болж байгаа юм. Нийгмийн халамж нь хөдөлмөр эрхлэлтэд нөлөөгүй, хөдөлмөрийн хөлсний доод хэмжээ өндөр нөлөөтэй байгааг харуулж байна. Нийт зарцуулалтын 69 хувийг хүүхдийн мөнгөн тэтгэмж эзэлжээ.