Турк болон Сири улсад газар хөдлөлтийн улмаас амиа алдсан иргэдийн тоо 4300 даваад байгааг албаныхан мэдээллээ. Улс орнууд Турк болон Сири улс руу аврах багаа илгээж эхлээд байна.

Монгол Улсын Засгийн газраас Бүгд Найрамдах Турк улсад эрэн хайх, аврах ажиллагаанд оролцох 35 хүний бүрэлдэхүүнтэй эмч, сувилагчдын баг, хүмүүнлэгийн бараа, бүтээгдэхүүн илгээх саналаа Турк улсын Элчин сайдын яаманд хүргүүллээ. Мөн Сири улсад хүмүүнлэгийн тусламж үзүүлэхээр болсон байна.

Газар хөдлөлт болсон бүс нутагт Монгол Улсын хоёр иргэн байгаа бөгөөд Анкара дахь Элчин сайдын яамнаас иргэдтэйгээ тогтмол холбоотой ажиллаж байгааг мэдээлсэн юм. Турк улсад Монгол Улсын 6000 гаруй иргэн оршин суудаг байна.

АНУ, БНХАУ, Япон болон БНЭУ Турк улс рүү аврах багаа илгээсэн бол ОХУ Сири улс дахь аврах ажиллагаанд дэмжлэг үзүүлэхээр 300 гаруй цэрэг илгээжээ. БНХАУ Турк улсад 5.9 сая ам.долларын хүмүүнлэгийн тусламж үзүүлэхээ мэдэгдээд байгаа бол Австрали болон Шинэ Зеланд Турк болон Сирид 11 сая ам.долларын тусламж үзүүлэхээ зарлалаа.

Даваа гарагт болсон 7.7 магнитудын газар хөдлөлтийн дараа Турк болон Сирийн нутагт дөрвөн магнитудаас дээш хүчтэй 100 гаруй чичиргээ бүртгэгдсэнийг албаныхан мэдээллээ.

Одоогоор аврах ажиллагаа үргэлжилж буй учир нас барсан болон нурангид дарагдсан хүмүүсийн  тоог гүйцэд тогтоох боломжгүй байгаа аж. Газар хөдлөлтөд өртсөн 330 мянга гаруй иргэнийг түр орогнох байранд шилжүүлсэн байна.