Вьетнамын хамгийн чинээлэг эрхмийн хөрөнгө оруулалттай “VinFast” компани анхны цахилгаан автомашинуудаа АНУ руу тээвэрлэлээ.

Гуравдугаар сарын нэгэнд “VF 8 City Edition” загварын 45 автомашиныг АНУ-ын Калифорни муж дахь есөн “showroom”-дээ  байршуулсан гэж “VinFast”-ийн толгой компани болох “VinGroup” мэдэгдсэн юм.

Автомашинууд “VinFast”-ийн дэлгүүрүүдээс эсвэл гэрт хүргэх үйлчилгээгээр дамжуулан хэрэглэгчдэд очихыг мэдэгдэлд дурджээ. Хэдий тийм боловч яг хэдэн автомашиныг хэрэглэгчдэд хүргүүлэхийг тодорхой дурдаагүй байна.

“VF 8 City Edition” загвар эко болон “Plus” хувилбар гэсэн сонголттой байх аж. Нэг цэнэглэлтээр 333 километр болон 307 километр зам туулах чадвартай. 

“VinFast” компанийн хувьд АНУ-ын хэрэглэгчдийн сонирхлыг татахаар Калифорни мужид өргөн хүрээг хамруулсан “test drive” буюу туршилтын жолоодлогын хөтөлбөр зохион байгуулж байгаа юм.