БНХАУ-ын автомашин үйлдвэрлэгчид барууны компаниудын ОХУ-ын зах зээлд үлдээсэн орон зайг нөхөж байна.

“Geely”, “Chery Automobile”, “Great Wall Motor” зэрэг БНХАУ-ын автомашин үйлдвэрлэгчид худалдан авахад боломжийн үнэтэй брэнд гэдгээрээ танигдаад байгаа аж. Дээрх  брэндүүд 2022 онд ОХУ-ын автомашины зах зээлийн 17 хувийг бүрдүүлжээ. Украины дайн эхэлснээс хойш “Volkswagen”, “Toyota Motor” зэрэг дэлхийд тэргүүлэх автомашин үйлдвэрлэгчид ОХУ-ын зах зээлийг орхисон юм. Харин БНХАУ-ын компаниуд хориг арга хэмжээнүүдээс үл хамааран ОХУ-ын зах зээлд үйл ажиллагаагаа явуулсаар байгаа аж.

Ши Жиньпин Владимир Путины талд зогссон хэвээр байгаа учир барууны компаниудаас ялгаатай нь БНХАУ-ын компаниуд ОХУ-ын зах зээлд үйл ажиллагаагаа явуулсан хэвээр байсан ч дотоодын хэрэглэгчдээсээ шүүмжлэл хүлээхгүй. Францын автомашин үйлдвэрлэгч “Renault” компани Украины дайн эхэлсний дараа ОХУ-ын зах зээлийг орхихоос болгоомжилж байсан юм.

Украины Ерөнхийлөгч Владимир Зеленский тус компанийг дайныг санхүүжүүлэгч хэмээн шүүмжилснээр долоодугаар сард ОХУ-ын зах зээлийг орхин гарч байв.

Мөн Японы “Fast Retailing” компани ОХУ-ын зах зээлийг тэр дороо орхиогүйгээс олон нийтийн сүлжээгээр шүүмжлэлд өртсөн юм.