АНУ тагнуулын ажиллагаанд ашиглаж байж болзошгүй гэсэн үндэслэлээр БНХАУ-ын нэгэн иргэний агаарын бөмбөлгийг устгасан явдлыг Бээжин хатуу шүүмжиллээ.

Энэхүү агаарын бөмбөлгийг энгийн иргэн уур амьсгалын судалгаа хийхэд ашиглаж байсан аж. Санаандгүйгээр АНУ-ын агаарын орон зайд нэвтэрсэн хувь хүний өмчийг устгасан нь олон улсын хууль дүрмийг зөрчсөн үйлдэл гэж БНХАУ-ын Гадаад хэргийн яам мэдэгдсэн байна.

Харин АНУ-ын Ерөнхийлөгч Жо Байден лхагва гарагт агаарын бөмбөлгийг хуурай газар дээр буй иргэдэд хохирол учруулалгүйгээр аль болох хурдан устгахыг Пентагонд тушааснаа мэдээллээ.

Цэргийнхэн агаарын бөмбөлгийг Атлантын далайн дээгүүр хөөрч эхэлмэгц устгажээ.

Агаарын бөмбөлгийг тойрсон маргаан АНУ болон БНХАУ-ын харилцаа сэргэх үндэс суурь тавигдаагүйн илрэл болж байна гэж Сингапурын Үндэсний их сургуулийн судлаач Дрю Томпсон мэдээллээ.

АНУ-ын Конгрессын Төлөөлөгчдийн танхимын спикерээр сонгогдоод буй Бүгд Найрамдах намын гишүүн Кэвин Маккарти Тайваньд айлчлахаа амлаж байсан юм. Тэрбээр энэхүү амлалтаа биелүүлбэл АНУ-БНХАУ-ын харилцаа улам хурцдахаар байна. Мөн Тайвань болон АНУ-ын Ерөнхийлөгчийн сонгуулийн үеэр сөргөлдөөн улам гүнзгийрч магадгүйг шинжээчид анхааруулж байгаа юм.