Mөнгөний нийлүүлэлт аравдугаар сарын эцэст 27.3 их наяд төгрөг болж, өмнөх оны мөн үеэс 0.7 хувиар өслөө. 2021 оны эцсийн дүнгээр  бодлогын хүү зургаан хувь байх үед мөнгөний нийлүүлэлтийн жилийн өсөлт 14.8 хувьтай байсан бол үүнээс хойш жилийн дүнгээр өсөлт тогтмол бага түвшинд байгаа юм.

Банкны системийн төгрөгийн хадгаламж буурсны нөлөөгөөр мөнгөний нийлүүлэлт сүүлийн улирлуудад үргэлжлүүлэн саарч байгааг Монголбанк онцолж байна. Тухайлбал: аравдугаар сарын эцэст төгрөгийн хадгаламж 12.4 их наяд төгрөг болж, өмнөх сараас 1.2 хувиар, өмнөх оны мөн үеэс 17.6 хувиар буурсан гэж Үндэсний статистикийн хороо мэдээллээ. Үүнтэй харьцуулахад валютын хадгаламж 4.6 их наяд төгрөг болж, өмнөх сараас 0.6 хувиар, өмнөх оны мөн үеэс 15.2 хувиар өсжээ.

Монголбанкны тооцооллоор банкны системийн долларжилт долоодугаар сарын байдлаар оны эхнээс зургаан нэгж хувиар өсөж, 29.3 хувь хүрсэн байна. Үүнд төгрөгийн ханш суларч байгаа нь голлон нөлөөлж байгаа аж. Он гарсаар төгрөгийн ханш ам.долларын эсрэг 19.6 хувиар сулраад байна. Ингэснээр төгрөгийн бодит хүү болон төгрөгийн харьцангуй өгөөж цаашид сөрөг түвшинд удаан хадгалагдах нь эх үүсвэрийн долларжилт үргэлжлэн нэмэгдэх эрсдэлтэйг Монголбанк онцлов.

Мөн сүүлийн гурван улирлын турш төлбөрийн тэнцэл алдагдалтай байгаагаас гадаад валютын албан нөөц он гарсаар 1.6  орчим тэрбум ам.доллароор буураад байна. Энэ нь мөнгөний нийлүүлэлтийн жилийн өсөлт саарахад голлон нөлөөлж байгаа аж.