БНХАУ-д Сар шинийн баярын дараах долоо хоногт бүртгэгдсэн Covid-19-ийн шалтгаант нас баралтын тоо өмнөх долоо хоногоос хоёр дахин буурсныг албаныхан мэдээллээ.

Энэ нь БНХАУ цар тахлын бодлогоо сулруулснаас хойш эрчимжээд байсан Covid-19-ийн давлагаа тогтворжиж буйг харуулж байна. Тодруулбал:  нэгдүгээр сарын 27-ноос хоёрдугаар сарын хоёрны өдрүүдэд Covid-19-ийн халдварын улмаас 3278 иргэн нас барсныг БНХАУ-ын Өвчнийг хянах, урьдчилсан сэргийлэх төв мэдээлжээ. Баярын өмнөх долоо хоногт тус улсад 6300 гаруй нас баралт бүртгэгдэж байсан аж.

Долоо хоног үргэлжилдэг Сар шинийн баярын сүүлийн өдөр нэгдүгээр сарын 27-нд тохиосон юм. Баярын үеэр БНХАУ-д хэдэн зуун сая иргэн дотооддоо аялсныг албаныхан мэдээлж байв.

Сар шинийн баярын дараа долоо хоногт нас баралтаас гадна Covid-19-ийн халдвараар хүнд өвчилж, эмнэлэгт хүргэгдэх иргэдийн тоо буурсныг мэргэжилтнүүд онцолж байна.