МҮХАҮТ-ын судалгаагаар 2021 оны “Хүнд суртлын индекс” 2018 оноос 0.18 нэгжээр буурсан байна. Өөрөөр хэлбэл бизнес эрхлэгчид Төрийн үйлчилгээ авахад хүнд суртал улам ихэссэн гэж үзэж байна.

Ерөнхий үнэлгээний дэд үзүүлэлтүүдээс  харвал төрийн байгууллагын ажлын уялдаа холбоо хамгийн бага үнэлгээтэй байгаа аж.

Бизнес эрхлэгчдийн 90 орчим хувь нь Төрийн үйлчилгээ авахдаа дунджаар зургаан баримт бичиг бүрдүүлж, Төрийн гурван албан хаагчтай харьцаж, 13 хоног зарцуулж, 360 мянган төгрөгийн албан зардал гаргадгийг судалгаа харуулжээ.

Ялангуяа лавлагаа, мэдээлэл авах үйлчилгээнд хугацаа, албан хаагчийн харилцаа хандлагад хамгийн бага үнэлгээ өгсөн байна. Мөн лавлагаа, мэдээлэл авах явцад хууль, дүрэм журам зөрчигдсөн гэж бизнес эрхлэгчдийн 10.2 хувь нь хариулжээ.

Харин зөвшөөрлийн үйлчилгээний хүрээнд бизнес эрхлэгчдийн 21.1 хувь нь үйлчилгээ авах явцад хууль, дүрэм журам зөрчигдсөн гэсэн байна.