COVID-19 цар тахал лабораторийн гаралтай байх өндөр магадлалтай гэж АНУ-ын эрчим хүчний яамны баримт бичигт дурдсан байна. Цагаан ордонд танилцуулсан тагнуулын, нууцлалтай мэдээллээр Вирусийг БНХАУ-ын лабораторид гарсан алдааны үр дүн гэж үзсэнийг “Wallstreet Journal” мэдээллээ.

АНУ-ын эрчим хүчний яам өмнө нь вирусийн гарал үүслийн талаар ямар нэг дүгнэлт гаргаагүй байсан юм. Тагнуулын шинэ мэдээллийн тусламжтайгаар ийнхүү урьдчилсан дүгнэлт гаргасан гэж эх сурвалж мэдээлсэн байна. Харин энэ талаар АНУ-ын Үндэсний аюулгүй байдлын зөвлөх Жэйк Салливан одоо байгаа тагнуулын мэдээллээс харвал энэ талаар тодорхой хариулт өгөх боломжгүй гэж мэдэгджээ.

Цар тахлын нөхцөл байдлыг харвал БНХАУ-д COVID-19-ийн халдварын тархалт тогтворжсонтой зэрэгцэн ханиад, томууны давлагаа эрчимжээд байгаа аж. Тухайлбал: энэ оны долоо дахь долоо хоногт ханиад, томууны өвчлөл 14.3 хувиар нэмэгджээ. Харин шинээр бүртгэгдэх COVID-19-ийн халдварын тохиолдол 3.4 хувиар буурсан байна.