
Зургийг: mining.com
“Ivanhoe Atlantic” компани Пакистаны “Mari Energies”-тэй ашигт малтмалын хайгуулын боломж судлах хамтын ажиллагааны санамж бичиг байгуулсныг Mining.com мэдээллээ. Ингэснээр тус компани Өмнөд Азийн зах зээлд хөл тавьж байна.
Компанийн Төлөөлөн Удирдах Зөвлөлийн дарга Роберт Фридланд Пакистаны ашигт малтмалын хөрөнгө оруулалтын форумын үеэр дээрх тохиролцооны талаар зарлаж, тус улсад Төлөөлөгчийн газар нээх бэлтгэл ажлаа эхлүүлснийг мэдэгджээ. Одоогоор “Mari Energies”-ийн охин компани Пакистанд зэс, алтны хайгуулын хэд хэдэн төсөл хэрэгжүүлж байгаа аж.
Мөн Роберт Фридланд эрх тэгш түншлэл байгуулах зорилготойгоо хэлсэн ч талуудын эзэмшил 50, 50 хувьтай байх эсэхийг баталгаажуулаагүй байна. Санхүүгийн нөхцөл, хайгуулын ажлын цар хүрээ болоод эцсийн гэрээ байгуулах хугацааны талаар талууд мэдээлсэнгүй.