“Түмэн Шувуут” ХК 2026 оны эхний есөн сард 178 сая ширхэг өндөг үйлдвэрлэсэн нь өмнөх оны мөн үеэс 46 хувиар өссөн дүн болсныг тус компанийн Гүйцэтгэх захирал Ж.Болд цахим хуудастаа мэдээллээ.

Энэ оны зургаадугаар сард “Түмэн Шувуут-3” фермийн бүтээн байгуулалт бүрэн дуусаж, ашиглалтад орсон юм. Ингэсээр  жилд 250 сая ширхэг өндөг үйлдвэрлэх хүчин чадалтай болж өргөжиж, дотоодын хэрэглээний 40-50 хувийг хангах боломжтой болоод буй.

“Түмэн Шувуут” компанийн борлуулалтын орлого III улирлын байдлаар өмнөх оны мөн үеэс 54 хувиар өсөж, 104 тэрбум төгрөг хүрээд байна.

Түүнчлэн тайлант хугацаанд 31.1 мянган тонн улаанбуудай худалдан авсан нь 57 хувиар өссөн үзүүлэлт боллоо. Мөн тэжээлийн үйлдвэрлэл 35 хувиар өсөж, 39 мянган тонн хүрсэн байна.

Тус компанийн хувьцааны ханш энэ он гарсаар 37.5 хувиар эрчимжээд байгаа бөгөөд зах зээлийн үнэлгээ нь 97.7 тэрбум төгрөгөөр хэмжигдэж байна.