(Bloomberg) -- “Hermès” компанийн Ази, Номхон далайн бүс нутгийн борлуулалт III улиралд өсөөгүй байна. Энэ нь БНХАУ-ын хэрэглэгчдийн зардлаа танах хандлага тус компанийн алдарт “Birkin” цүнхний эрэлтэд ч нөлөөлж буйг харууллаа.

“Hermès International”-ийн мэдээлснээр тус компанийн хамгийн том зах зээл болох Японоос бусад Ази, Номхон далайн бүс нутаг дахь борлуулалтын орлого нь III улиралд валютын ханшийн зөрүүг оруулж тооцсон дүнгээр өөрчлөлтгүй байжээ. Энэ нь шинжээчдийн таамаг болох 1.55 хувийн өсөлтөөс доогуур үзүүлэлт боллоо. Тус бүс нутаг компанийн нийт борлуулалтын орлогын 42 орчим хувийг бүрдүүлж байгаа аж.

Парисын Хөрөнгийн биржид “Hermès”-ийн хувьцааны ханш арилжааны явцад 5-7 хүртэлх хувиар буурсан байна. Энэ он гарсаар 40 орчим хувиар сулраад байгаа юм. 1993 онд Хөрөнгийн биржид анх бүртгүүлснээс хойш тус компанийн хувьцааны ханш хамгийн тааруу нэг  жилээ үдэх төлөвтэй байна.