“Манай брэндийн онцлогийг орчин үе ба уламжлал гэсэн хоёр ойлголтоор илэрхийлж болно. Бид хүрэм урлахдаа Неаполийн уламжлалыг хадгалахын зэрэгцээ даавуу, эсгүүр, дүр төрхөд нь орчин үеийн хэв маягийг шингээдэг” гэж ISAIA-ийн Гүйцэтгэх захирал Жанлука Исайя тус брэндийн Монгол дахь 10 жилийн ойн арга хэмжээний үеэр онцолж байлаа. 100 гаруй жилийн түүхтэй тус брэнд цар тахлын дараа өдөр тутмын болон чөлөөт загварын цуглуулгаа өргөжүүлж, сонгодог хослолыг залуу үеийн хэв маяг, тав тухтай нийцүүлсэн шийдлүүдийг нэмэгдүүлжээ.

 

“Анх ISAIA брэндийг Монголд мэддэг хүний тоо гарын арван хуруунд багтдаг байсан бол өнөөдөр маш олон хэрэглэгчтэй болсонд баяртай байна. Niche брэндийг жижиг зах зээлд амжилттай таниулж, олон улсын тансаг зэрэглэлийн брэндүүдийн төлөөллөөр үйл ажиллагаагаа өргөжүүлсэн он жилүүд байлаа” гэж “Премьер Тэйлор”-ийн үүсгэн байгуулагч Т.Зориг онцолсон юм.

 

ISAIA энэ оныг 100 сая евро давсан борлуулалтын орлоготой хааж, 2027 оны санхүүгийн жилд хоёр оронтой өсөлтөө хадгална гэж тооцоолж байна. Дэлгүүрүүддээ үргэлжлүүлэн хөрөнгө оруулахын зэрэгцээ Монгол дахь үйл ажиллагааныхаа хоёр дахь арван жилд хэрэглэгчдийн өөрчлөгдөж буй сонголт, эрэлтэд нийцсэн өсөлтийг үргэлжлүүлэхээр зорьж буйгаа мөн илэрхийллээ.