(Bloomberg) -- Өнөөг хүртэл дохио өгсөөр ирсний эцэст Илон Маск өөрийн хамгийн өндөр үнэлгээтэй хоёр компани болох “SpaceX” болон “Tesla”-ийг нэгтгэх санааг дэмжиж байгаагаа мэдэгджээ. Тэрхүү хэлцлийг 2027 оны эхний хагас гэхэд албан ёсоор зарлаж, Дональд Трампын бүрэн эрхийн хугацаанд багтаан хаахыг зорьж байгаа талаар эх сурвалжууд мэдээлж байна.

Дээрх төлөвлөгөө хэрэгжвэл түүхэн дэх хамгийн том хэмжээний компанийн нэгдэх хэлцэл болох бөгөөд нийт 3.7 их наяд ам.долларын зах зээлийн үнэлгээтэй хоёр компани нэг бүтэц дор орох юм. Илон Маскийн хувьд дараалсан хоёр орлогын тайланг танилцуулах хуралтай зэрэгцэн компаниудыг нэгтгэх талаар байр сууриа илэрхийлсэн байна.

Зургийг: Win McNamee/Getty Images/Bloomberg

Тэрбээр АНУ-ын Ерөнхийлөгч Дональд Трамптай харилцаагаа сэргээснээр Цагаан ордонд дахин нэвтрэх боломжтой болсноос гадна хөрөнгө оруулагчдын сонирхол өндөр байгаа энэ мөчийг ашиглаж байна.  Хэдий тийм боловч завсрын сонгууль болоход хоёр долоо хоног хүрэхгүй хугацаа үлдсэн тул эдгээр давуу тал удаан үргэлжилнэ гэсэн баталгаа байхгүй. АНУ-ын Ардчилсан нам Конгрессын аль нэг танхимд ялалт байгуулбал дэлхийн хамгийн чинээлэг эрхэм болон түүний компаниуд зохицуулагчдын хяналт шалгалтад өртөх эрсдэл нэмэгдэх юм.

Илон Маскийн хувьд Бүгд Найрамдах намын сонгуулийн кампанит ажилд ойролцоогоор 369 сая ам.доллар зарцуулаад байгаа аж. Энэхүү хандив нь Техас дахь Сенатын төлөөх өрсөлдөөн зэрэг зарим эмзэг тойргийн үр дүнд нөлөөлж магадгүй байгаа юм.

“SpaceX” болон “Tesla”-ийг нэгтгэх хугацаа нь “Tesla”-ийн Төлөөлөн Удирдах Зөвлөл хэлцлийн нарийн нөхцөлүүдэд хэзээ итгэл үзүүлэхээс шалтгаална гэдгийг нэрээ нууцалсан эх сурвалжууд мэдээлжээ.

“SpaceX”-ийн хувьд Илон Маск санал өгөх эрхийн 80 гаруй хувийг удирддаг тул хувьцаа эзэмшигчдээс зөвшөөрөл авахад багахан сорилттой тулгарна. Харин тэрбээр “Tesla”-ийн нийт хувьцааных нь 20 хувийг л эзэмшдэг учраас харьцангуй ярвигтай байх юм.