Ашигт ажиллагаа нь сэргэсэнтэй зэрэгцэн “Говь” ХК түүхэн дэх хамгийн өндөр борлуулалтын орлоготой эхний гурван улирлаа үдлээ. Тус компанийн борлуулалтын орлого оны эхний есөн сард өмнөх оны мөн үеэс 15.8 хувиар өсөж, 190 тэрбум төгрөг хүрсэн байна.

Мөн санхүүгийн хоёр улирал дараалан алдагдал хүлээсний дараа тус компани 5.36 орчим тэрбум төгрөгийн цэвэр ашигтай ажилласан байна. Өмнөх оны мөн үед 10 орчим тэрбум төгрөгийн алдагдал хүлээж байсан “Говь” ХК-ийн борлуулалт өсөж, удирдлагын болон санхүүгийн зардал буурсан нь үр дүн сайжрахад нөлөөлжээ.

Дотоодын зах зээлийн хувьд бүтээгдэхүүний үнийн бодлогыг шинэчилж, хоёрдугаар сараас дижитал маркетингийн үйл ажиллагааг эрчимжүүлснээр борлуулалтын өсөлтийг дэмжихэд голлон нөлөөлж буй талаар тус компани оны эхний хагас жилийн үйл ажиллагааны тайландаа онцолж байсан юм.

Мөн энэ он гарсаар БНХАУ, БНСУ болон Европ зэрэг гадаад зах зээлд борлуулалтын сувгаа өргөжүүлэх ажлыг эрчимжүүлж буйгаа тодотгож байв.

Түүнчлэн есдүгээр сард Казахстан улс дахь охин компанийнхаа үйл ажиллагааг эхлүүлэхээр бүтээгдэхүүн нийлүүлэх гэрээ байгуулахаар болсноо мэдээлсэн юм. Одоогоор “Говь” компанийн нийт борлуулалтын орлогынх нь 20 орчим хувийг гадаад зах зээл бүрдүүлж байгаа аж.

Он гарсаар тус компанийн хувьцааны ханш 18 хувиар өссөн хөдөлгөөнтэй байна.