(Bloomberg) -- Австралийн “Macquarie” хөрөнгө оруулалтын банк Ойрх Дорнодын нийлүүлэлт хурдацтай сэргэнэ гэж үзэн газрын тосны үнийн энэ он болон 2027 оны үнийн төсөөллөө буурууллаа.

Шинэчилсэн таамгаар брент төрлийн газрын тосны үнэ энэ онд баррель нь дунджаар 77 ам.доллар байна гэж тооцоолсон байна. Энэ нь өмнөх таамаг болох 89 ам.доллароос эрс буурсан үзүүлэлт юм. Харин 2027 оны төсөөллийг 74 ам.доллароос танаж, 64 ам.доллар болгожээ.

Сүүлийн байдлаар брент төрлийн газрын тосны ханш 0.5 хувиар суларч, баррель нь 76 ам.долларт арилжаалагдаж байна. Харин WTI төрлийн газрын тосны үнэ 0.5 хувиар буурч, баррель нь 72 ам.доллар болжээ.

АНУ болон Иран түр хэлэлцээрт хүрснээр Персийн булангийн олборлогч орнууд экспортоо сэргээхээр яаравчилж буй. Тухайлбал: Арабын Нэгдсэн Эмират улсын газрын тосны экспорт дайны өмнөх үеийн түвшнийхээ бараг 85 хувьд хүрснийг Олон Улсын Эрчим Хүчний Агентлаг мэдээлсэн юм.

Зургаадугаар сарын эхээр Арабын Нэгдсэн Эмират өдөрт 4.3 сая баррель газрын тос нийлүүлсэн байна. Энэ нь гуравдугаар сард ердөө 1.9 сая баррель байсантай харьцуулахад эрс өндөр үзүүлэлт юм.