(Bloomberg) -- Ираны дайнаас үүдэлтэй саатлыг хиймэл оюуны техник хангамжийн эрэлт нөхсөнөөр тавдугаар сард БНХАУ-ын экспорт болон импорт шинжээчдийн таамагласнаас хурдацтай өслөө. Тус улсын экспорт өмнөх оны мөн үеэс 19 гаруй хувиар нэмэгдсэн нь сүүлийн гурван сар дахь хамгийн огцом өсөлт болов. Мөн энэ нь “Bloomberg”-ийн судалгаанд оролцсон шинжээчдийн дундаж таамаг болох 15 хувиас өндөр байна.

Өнгөрсөн сард импорт 27 хувиар өссөнөөр БНХАУ-ын гадаад худалдааны тэнцэл 105.4 тэрбум ам.долларын ашигтай гарсан нь нэгдүгээр сараас хойших дээд үзүүлэлт юм.

Дэлхийн эрчим хүчний хямралаас үл хамааран хиймэл оюуны дэд бүтцийн бүтээн байгуулалт эрчимжиж буй нь энэ онд Азийн худалдааг урагшлуулах гол хөдөлгөгч хүч болж байна. Тухайлбал: тавдугаар сард БНСУ-аас БНХАУ-ын авсан хагас дамжуулагчийн импорт өмнөх оны мөн үеэс 200 гаруй хувиар өсжээ.

Харин БНХАУ-ын компьютер, эд ангийн экспорт 66 хувиар өссөн нь 2010 оноос хойших хамгийн өндөр үзүүлэлт боллоо.

Үүнээс гадна АНУ-д хийсэн БНХАУ-ын экспорт 2021 оноос хойших хамгийн өндөр дүнгээр буюу бараг 36 хувиар өссөн нь анхаарал татаж байгаа юм. Ерөнхийдөө БНХАУ-ын экспорт Европын Холбоо, Латин Америкаас бусад томоохон бүс нутагт хурдацтай өсөж байна.