(Bloomberg) -- Украины дайралт улам ширүүсэж, нефть боловсруулах үйлдвэрүүдийн гарц олон жилийн доод түвшинд ирсэнтэй холбогдуулан ОХУ дизель болон нисэх онгоцны түлшний экспортыг хязгаарлах асуудлыг хэлэлцэж буйг "Interfax" агентлаг мэдээллээ. Тодруулбал: ОХУ-ын Шадар сайд Александр Новак мягмар гарагт дотоодын түлшний зах зээлийн асуудлаар уулзалт хийснийхээ дараа нефтийн компаниудад газрын тосны бүтээгдэхүүнийг гадаад зах зээлд борлуулахаа багасгахыг зөвлөснийг эх сурвалжууд мэдээлсэн байна.

Түүнчлэн дизель болон нисэх онгоцны түлшний экспортыг хориглох үйл явц эцсийн шатандаа орсон ч хориг хэрэгжиж эхлэх хугацааг хараахан тогтоогоогүй байгааг дурджээ.

ОХУ дизель түлшний гол экспортлогч тул хориг хэрэгжиж эхэлбэл дэлхийн зах зээл дэх газрын тосны бүтээгдэхүүний үнэд нэмэлт дарамт үзүүлэх юм.

"OiLX" аналитик компанийн тооцооллоор ОХУ-ын нефть боловсруулах үйлдвэрүүдийн өдрийн дундаж боловсруулалт дөрөвдүгээр сард 4.69 сая баррель болж буурсан нь сүүлийн 16  орчим жилийн хамгийн доод үзүүлэлт болжээ.

АНУ болон Иран харилцан гал нээснээр газрын тосны ханш өссөн ч эргэн унаад байна. Сүүлийн байдлаар брент төрлийн газрын тосны үнэ нэг хувиар унаж, баррель нь 98 ам.доллар боллоо.