(Bloomberg) -- Японы инфляц сүүлийн таван сард анх удаа эрчимжлээ. Энэ нь газрын тосны үнийн өсөлт эдийн засагт нь бүрэн нөлөөлж эхлэхээс өмнө инфляцын дарамт нэмэгдэж байсныг харуулж байна.

Гуравдугаар сард шинэ хүнсний үнийг хасаж тооцсон хэрэглээний үнийн индекс өмнөх оны мөн үеэс 1.8 хувиар өссөнийг Японы Дотоод хэргийн яамнаас мэдээлэв. Энэ нь өмнөх сард 1.6 хувиар өссөнтэй харьцуулахад өндөр үзүүлэлт болж байна. Мөн шинжээчдийн дундаж төсөөлөл болох 1.7 хувийг давжээ.

Түүнчлэн өнгөрсөн сард Японы Төв банкны голлон анхаардаг шинэ хүнс, эрчим хүчний үнийг хасаж тооцсон суурь инфляц 2.4 хувь хүрсэн байна. Энэ нь тус улсын Төв банкны зорилтот түвшин болох хоёр хувиас өндөр дүн юм. Хэдий тийм боловч ерөнхий инфляц 1.5 хувьтай байна.

Дэлхийн эрчим хүчний хямралын нөлөөгөөр газрын тосны үнэ өссөнөөс гадна иений ханш тасралтгүй суларч байгаа нь Японд импортын бараа, бүтээгдэхүүний үнийг хөөрөгдөж байгаа юм. 

Мөн гуравдугаар сарын хэрэглээний үнийн индексэд эрчим хүчний үнийн огцом өсөлт бүрэн тусгагдаагүй байх магадлалтай байгаа аж. Өнгөрсөн сарын дундуур Засгийн газраас нь шатахууны үнийг 170 иен орчимд барих татаасыг сэргээхээс өмнө нэг литр нь 190.8 иен болж, дээд түвшинд хүрчээ.

Энэхүү татаас нь Японы Ерөнхий сайд Санаэ Такаичигийн Засгийн газарт төсвийн асар их зардал гаргасан байна. Баасан гарагт нийтлэгдсэн тайланд шатахууны үнэ өмнөх оны мөн үеэс 5.4 хувиар буурсан гэж дурдсан нь хоёрдугаар сард 14.9 хувиар буурсантай харьцуулахад саарсан үзүүлэлт боллоо.