(Bloomberg) -- БНХАУ-ын зарим экспортлогчид хүүхдийн тоглоомоос авхуулаад хувцас хүртэл бараа, бүтээгдэхүүнийхээ үнийг өсгөж эхэллээ.

Ойрх Дорнодын мөргөлдөөний улмаас шатахууны хомсдол үүссэн нь түүхий эд, үйлдвэрлэлийн зардлыг хөөрөгдөж байна. Ингэснээр өнгөрсөн долоо хоногоос цахим худалдаачдаас гадна бөөний нийлүүлэгч нар ч бараа, бүтээгдэхүүнийхээ үнийг өсгөж эхэлснийг эх сурвалжууд мэдээлжээ.

Газрын тосноос гаралтай түүхий эдүүд болох полиэстер, акрил мяндаснаас гадна полиуретан зэрэг хуванцар материалын үнэ Ираны дайн эхэлсэн эхний долоо хоногт 50 хүртэлх хувиар өсжээ. Түүнээс хойш үнэ нь буурсан ч дайны өмнөх үеэс 10 гаруй хувиар өндөр түвшинд хадгалагдаж буйг БНХАУ-ын ханган нийлүүлэгчид мэдээлсэн байна.

Үүнээс гадна ачаа тээврийн зардал өссөн нь дарамт болж байгаа аж. Тээврийн үнэ 10-30 хувиар өссөн бөгөөд зарим чиглэлд 50 хүртэлх хувиар нэмэгдсэнийг экспортлогчид онцолж байна.