АПУ ХК-ийн цэвэр борлуулалтын орлого оны эхний хагас жилийн байдлаар 649 тэрбум төгрөг хүрсэн байна. Энэ нь өмнөх оны мөн үеэс 25.2 хувиар өссөн үзүүлэлт боллоо. Тайлант хугацаанд тус компанийн цэвэр ашиг өмнөх оны мөн үеэс 51 хувиар өсөж, 108 тэрбум төгрөг хүрсэн нь онцлох үзүүлэлт болж байна.

Борлуулалтын орлогын өсөлт нь сүү, сүүн бүтээгдэхүүн, ус ундаа болоод “Дижитал концепт” ХХК болон экспортын борлуулалтын өсөлтөөс хамаарсан гэдгийг АПУ ХК онцоллоо.

Инфляц болон гадаад валютын ханшийн өсөлт нийлүүлэлтийн гинжин сүлжээний үнийн өсөлтөөс хамаарч түүхий эд материалын үнэ өссөнийг мэдээлсэн юм. Ингэснээр бүтээгдэхүүн үйлчилгээний үнэ өсөхөд шууд нөлөөлснийг тодотгов.

Энэ он гарсаар тус компанийн хувьцааны ханш 15.5 хувиар буурсан бөгөөд сүүлийн арилжаа хаахад 1014 төгрөг байна.

АПУ ХК-ийн хувьцааны ханшаар илэрхийлэх зах зээлийн үнэлгээ нь нэг их наяд гаруй төгрөг байгаа юм. Оны эхний хагас жилийн байдлаар зах зээлийн үнэлгээгээр Монголын Хөрөнгийн биржид дөрөвдүгээрт эрэмбэлэгджээ.

Монголын Хөрөнгийн биржийн тайлангаас харахад I-VI сард АПУ компанийн 4.7 сая ширхэг хувьцаанд 4.8 тэрбум төгрөгийн арилжаа хийсэн байна. Арилжааны үнийн дүнгийн идэвхээр дөрөвдүгээрт эрэмбэлэгдэж байгаа юм.