Гадаад худалдааны бараа эргэлт оны эхний долоон сард 15.7 тэрбум ам.доллар болж, өмнөх оны мөн үеэс 14.2 хувиар өссөнийг Гаалийн ерөнхий газар мэдээллээ. Харин гадаад худалдааны ашиг 2.9 тэрбум ам.доллар хүрээд байна.

Экспортын бараа, бүтээгдэхүүнийг өнгөрсөн оны мөн үетэй харьцуулахад 6.5 хувиар, импорт 27.6 хувиар тус тус өссөн үзүүлэлттэй байна.

Экспортын гол түүхий эд нүүрсийг аваад үзвэл эхний долоон сард нийт 46.1 сая тонн чулуун нүүрс экспортолсон нь 2023 оны мөн үеэс 35.5 хувиар өсжээ. Үнийн дүнгийн хувьд 5.3 тэрбум ам.доллар буюу нийт экспортын 57.9 хувийг бүрдүүлж байна.

Энэ онд нүүрсний экспортыг 78 сая тонн хүргэнэ гэж 2025 оны төсвийн хүрээний мэдэгдэл, 2026-2027 оны төсвийн төсөөллийн тухай хуулийн төсөлд тусгаад байгаа юм. Нүүрсний экспортын биет хэмжээ нэмэгдэж буй ч хилийн үнэ дундаж үнэ буурах хандлага ажиглагдаж байна.

“Биет хэмжээний өсөлтийн өөдрөг төсөөллөөс үүдэн экспортын орлого дээр тулгуурлан тооцдог эдийн засгийн өсөлт, төсвийн орлого, зарлага зэрэг нь хэт өөдрөг болох гээд буй”-г Эдийн засагч Н.Энхбаяр онцолж байлаа.