2024 оны эхний хагас жилийн макро эдийн засгийн үзүүлэлтүүд болон оны эцэст хүлээгдэж буй төсөөллийг Сангийн яам танилцууллаа.

Оны сүүлийн хагас жилд улирлын нөлөөгөөр инфляц өсөх хандлагатай байгаа бөгөөд Засгийн газрын ирэх дөрвөн жилийн үйл ажиллагааны хөтөлбөрт тусгасан эрчим хүчний реформын хүрээнд цахилгаан, дулааны үнэ тарифыг нэмэгдүүлбэл 2024 оны жилийн дундаж инфляц 6.5 хувь болж бага зэрэг өсөх хандлагатайг тайланд онцолжээ.

Макро эдийн засгийн үзүүлэлтүүдэд учирч болзошгүй эрсдэлүүдийг харвал оны эхний хагас жилд зудын улмаас том малын зүй бус хорогдол 8.1 саяд хүрсэн нь хөдөө аж ахуйн салбарын нийлүүлэлтэд сөргөөр нөлөөлж, улмаар нийлүүлэлтийн гаралтай инфляцын дарамтыг нэмэгдүүлж, эдийн засгийн өсөлтөд сөргөөр нөлөөлөх эрсдэлтэй гэж үзсэн байгаа аж.

Мөн  хөрш орнуудыг хамарсан геополитикийн асуудлууд өрнөж буй энэ үед Монгол Улсын зээлжих зэрэглэл буурах, аливаа төрлийн хоригт өртөхгүй байх нь чухал болохыг онцолж байна.

Харин гадаад талаас нь харвал дэлхийн зах зээл дээрх түүхий эдийн үнийн тодорхой бус байдал, эрчим хүчний дутагдал, уур амьсгалын өөрчлөлт зэрэг нь макро эдийн засгийн үзүүлэлтүүдэд сөргөөр нөлөөлж болзошгүйг тайланд дурджээ.