Турк улс Истанбулын Хөрөнгийн биржийн арилжааг үргэлжлүүлэн хаах асуудлыг хэлэлцэж байгааг эх сурвалж мэдээллээ. Өнгөрсөн долоо хоногт Истанбулын Хөрөнгийн биржийн арилжааг лхагва гараг хүртэл хаасан юм. Харин албаныхан биржийн арилжааг зогсоох шийдвэрээ дахин сунгахаар хэлэлцэж байгаа аж.

Туркийн сөрөг хүчин зохицуулах байгууллагыг Истанбулын биржийн удирдлагуудыг ажлаас нь чөлөөлөхийг шаардаж байгаа аж. Учир нь газар хөдлөлтийн дараах эхний хэд хоногт биржийн арилжааг зогсоогүйдээ хариуцлага хүлээх ёстой гэж үзэж байгаа юм. Лхагва гарагт арилжааг зогсоох хүртэл “Borsa Istanbul 100 Index”-д бүртгэлтэй компаниудын үнэлгээ хоёр хоногийн дотор 35 тэрбум ам.доллароор буурчээ.

Үүнээс гадна даваа гарагт Туркийн Сангийн яам хувьцаагаа эргүүлэн худалдан авч буй компаниудад 15 хувийн татвар ногдуулахаар шийдвэрлэснийг эх сурвалж мэдээллээ. Хөрөнгийн зах зээл уналтад ороод буй энэ үед ийнхүү шийдвэрлэсэн нь шинжээчдийн анхаарлыг татаж байна.

Өнөөдрийн байдлаар газар хөдлөлтийн улмаас Турк болон Сирид амиа алдсан иргэдийн тоо 36 мянга даваад байгааг албан эх сурвалж мэдээллээ.