Нийлүүлэлт тааруу байна гэсэн болгоомжлол нэмэгдсэнээр Нью-Йорк болон Лондонд элсэн чихрийн үнэ эрс өслөө. Тухайлбал: Лондонд цагаан элсэн чихрийн фьючерс үнэ 2.7 хувиар өсөж, 2011 оны 11 дүгээр сараас хойших дээд түвшинд хүрсэн байна.

Мөн боловсруулаагүй элсэн чихрийн үнэ Нью-Йоркийн биржид 2.6 хувиар өсөж, 2016 оны аравдугаар сараас хойших дээд түвшинд хүрчээ.

Элсэн чихрийн экспортоор тэргүүлэгч Энэтхэг улсын нийлүүлэлт буурах төлөвтэй байгаа нь ийнхүү элсэн чихрийн үнэ өсөхөд голлон нөлөөлж байгаа аж. Нийлүүлэлтэд квот тогтоодог учир экспортоо нэмэх төлөвгүй байгаа юм байна. БНЭУ-ын боловсруулах үйлдвэрүүд эрэлтийг хангахын тулд дотоодын боловсруулаагүй элсэн чихрийн зэрэгцээ Бразилаас түүхий эдээ импортолж магадгүй байгаа ажээ.

Бразилын хувьд тариалангийн улирал эхэлсэн ч тээвэрлэлтийн саатал экспортод нь сөргөөр нөлөөлж байгаа аж. Тус улсын шар буурцгийн гарц дээд цэгт хүрсэн учир боомт, төмөр замын тээврийн ачаалал нэмэгджээ. Ингэснээр тариалангийн улирлын эхэн үед Бразилын элсэн чихрийн экспорт шаардлагатай хэмжээнд нэмэгдэхгүй байх эрсдэлтэйг шинжээчид мэдээллээ.

Түүнчлэн Тайланд, БНХАУ, Мексик, Европын нийлүүлэлт тааруу байгаа нь болгоомжлолыг нэмэгдүүлж байна.