АНУ-ын газрын тосны компаниудад хувьцаа эзэмшигч нар өнгөрсөн онд 128 тэрбум ам.доллартой тэнцэх гэнэтийн ашиг хүртсэн гэж “Bloomberg”-ийн шинжээчид тооцооллоо.

2022 онд АНУ-ын газрын тос олборлогчид  хөрөнгө оруулалтын төслүүдээс илүү хувьцаагаа эргүүлэн худалдан авах, ногдол ашиг тараахад хөрөнгөө зарцуулсан байна. Энэ нь сүүлийн 10 жилийн анхны тохиолдол болж байгаа аж.

Мөн АНУ-ын газрын тосны 26 компани нийт 128 тэрбум ам.долларын ногдол ашиг тараасан нь 2012 оноос хойших дээд үзүүлэлт болжээ. Өнгөрсөн онд АНУ-ын Ерөнхийлөгч Жо Байден газрын тосны компаниудыг олборлолтоо нэмэгдүүлж, үнийн дарамтыг бууруулахыг хүссэн ч амжилт олоогүй юм.

Хөрөнгө оруулагчид 2030 он гэхэд шатах түлшний эрэлт оргилдоо хүрснээр урт хугацаанд ашгаа өгөх газрын тосны хэдэн тэрбум ам.долларын томоохон төслүүд хэрэгцээгүй болно гэж болгоомжилж байна.