2022 онд жижиглэн худалдааны салбарын борлуулалтын орлого 22.1 их наяд төгрөг болж, өмнөх оноос 27.2 хувиар өслөө. Энэ нь өмнөх оны өсөлтөөс давсан буюу сүүлийн гурван жилийн хугацааны хамгийн өндөр дүн болж байна.

Бөөний худалдааны салбарын борлуулалтын орлого мөн л сүүлийн гурван жилийн дээд түвшинд хүрч, 15.5 их наяд төгрөг давжээ. Энэ нь өмнөх оноос 33.1 хувиар өссөн дүн болж байна.

НӨАТ төлөгч хуулийн этгээдийн мэдээллийн санд үндэслэн тооцоолсноор 2022 онд худалдааны салбарын нийт орлого 37.7 их наяд төгрөг давж, жилийн дүнгээр 29.5 хувиар өсжээ. Үүний 21.8 хувийг хүнсний бүтээгдэхүүн, 78.2 хувийг хүнсний бус бүтээгдэхүүний борлуулалт эзэлж байна. Энэхүү өсөлтийн дийлэнхийг шатахууны борлуулалтын орлогын өсөлт бүрдүүлсэн аж.

Аймгуудаар авч үзвэл Өмнөговь аймагт худалдааны борлуулалт хамгийн өндөр буюу 896.4 тэрбум төгрөг, Говь-Алтай аймагт 96 тэрбум төгрөг буюу хамгийн бага дүнтэй гүйлгээ бүртгэгдсэн байна.