Дубайн үл хөдлөх хөрөнгийн зах зээл  дэлхийн чинээлэг эрхмүүдийн анхаарлыг татаж байна. Ялангуяа “Four Seasons”, “Bulgari”, “Cavalli” зэрэг брэндийн нэртэй таун хаус, орон сууцуудын эрэлт өндөр байгааг “Sotheby's”-ийн үл хөдлөх хөрөнгө зуучлагчид онцоллоо.

Энэ долоо хоногт л гэхэд баригдаж эхлээгүй байгаа “Baccarat” брэндийн нэртэй, унтлагын таван  өрөө бүхий амины орон сууцны төсөл 55.3 сая ам.доллароор борлуулагдсан байна. Нэг м²-ыг нь 3800 гаруй ам.доллароор үнэлсэн нь баригдаж эхлээгүй орон сууц хамгийн өндөр үнэ хүрсэн тохиолдол болж байгаа юм. Энэ нь хоёрдугаар сард унтлагын таван өрөө бүхий орон сууц м² нь 3744 ам.доллароор буюу 43.6 сая ам.доллароор борлуулагдсан дээд амжилтыг эвджээ.  

Дээд амжилт тогтоогоод буй шинээр баригдаж байгаа тансаг зэрэглэлийн амины орон сууц далайн морины хэлбэртэй бүтээсэн арал дээр баригдах аж.

Дубай хот Украины дайн эхэлснээс хойш хоригт өртсөн ОХУ-ын тэрбумтнуудын "орогнох" газар болоод байгаа юм. Өнгөрсөн оны аравдугаар сард л гэхэд тансаг зэрэглэлийн үл хөдлөх хөрөнгийн үнэ 89 хувиар өсжээ. Тухайлбал: 2022 онд Дубай хотноо брэндийн нэртэй орон сууцуудын нийт үнэлгээ 6.8 тэрбум ам.доллар давсан нь дээд үзүүлэлт болсон байна.

Брэндийн нэртэй орон сууцууд үнийн дүнгийн хувьд тус хотын нийт орон сууцны борлуулалтын үнэлгээний 20 хувийг дангаараа бүрдүүлж буйг “Knight Frank” мэдээллээ.