Тайланд улс 2023 он гарсаар 9.47 сая жуулчин хүлээн авч, 11 тэрбум ам.долларын орлого олсныг Засгийн газрынх нь хэвлэлийн төлөөлөгч мэдээллээ. Эдгээр жуулчдын дийлэнх нь Азийн орнуудаас иржээ. Тухайлбал: БНХАУ-аас ирэх жуулчдын тоо эрчимтэй өсөж байгаа нь аялал жуулчлалын салбарын сэргэлтийг эрчимжүүлэх төлөвтэйг онцолж байна.

Энэ онд тус улс БНХАУ-аас 5.3 сая жуулчин хүлээн авахаар тооцоолжээ. Хэдий тийм боловч 2023 он гарсаар Тайланд улсаар айлчилсан жуулчдын дийлэнх хувийг одоогоор Малайз болон БНЭУ-ын жуулчид бүрдүүлж байгаа аж.

Агаарын навигацийн үйлчилгээ үзүүлэгч “Aeronautical Radio of Thailand Limited” (AEROTHAI)  компани 2022 оны аравдугаар сараас 2023 оны дөрөвдүгээр сар хүртэлх хугацаанд Тайланд улс БНХАУ-аас 12 мянга 805 нислэг хүлээн авсныг мэдээлжээ. Энэ нь өмнөх оны мөн үеэс 98 хувиар өссөн үзүүлэлт боллоо. Цаашид энэ оны есдүгээр сарыг хүртэл БНХАУ-аас ирэх нислэг улам нэмэгдэх төлөвтэйг “AEROTHAI” онцолж байна. Ингэснээр энэ онд Тайланд улс БНХАУ-аас 46 мянга гаруй нислэг хүлээн авна гэж тооцоолжээ.

Түүнчлэн энэ онд БНХАУ-аас ирэх жуулчдын тоог нэмэгдүүлэхийг дэмжсэн арга хэмжээ хэрэгжүүлбэл ирэх жуулчдын тоо долоон сая хүрэх боломжтой гэж Тайланд улсын Засгийн газар мэдээллээ.