Улаанбаатар-Дархан чиглэлийн авто замын хучилтын зузааныг таван см-ээр нэмэгдүүлэх зардал болох 20 сая ам.долларыг ЕСБХБ-ны нэмэлт санхүүжилтээр шийдвэрлэхээр тохиролцлоо.

Энэхүү авто замын төслийн үндсэн ажлуудыг аравдугаар сарын 30-ны өдөр дуусгахаар ажиллаж байгаа юм. Үлдэж буй гурав орчим км замын хучилтыг энэ долоо хоногт дуусган тээврийн хэрэгслийн хөдөлгөөнийг 11 дүгээр сарын хоёрноос нээх төлөвлөгөөтэй байгаа аж.

Улаанбаатар-Дархан чиглэлийн авто замыг дөрвөн эгнээ болгон өргөтгөх бүтээн байгуулалтын ажлын шинээр хоёр эгнээ нэмж барих төслийг ЕСБХБ-ны зээлийн санхүүжилтээр хэрэгжүүлж байгаа ба 2021 оны гуравдугаар сараас барилгын ажил эхэлж, одоогийн байдлаар таван багц ажилд хуваагдан хэрэгжиж байна.

Ням гарагийн байдлаар Улаанбаатар-Дархан чиглэлийн авто замын “Багц-4” хэсэгт Хустайн давааны 4.1 км авто замын хучилтын ажлыг дуусгажээ. Шинээр хучсан авто замуудад, замын хөвөө, тэмдэг тэмдэглэгээ хийх ажлыг үргэлжлүүлэн хийж байгаа аж.

Одоогоор “Багц-4” хэсэгт Баруунхараагийн Хараа голын гүүр болон төмөр замын гармын хоёр талд 1.6 орчим км, “Багц-2” хэсэгт 3.5 км авто замын хучилт хийгдээгүй байна.