Ирэх онд БНХАУ-ын эдийн засгаа таван хувиар өсгөх зорилт нь боломжгүй зүйл биш гэж “JPMorgan Chase”-ийн эдийн засагчид үзлээ.

Хэдий тийм боловч энэ нь БНХАУ-ын удирдагчид хэдэн жил цар тахлын хорионд байсан эдийн засгаа нээх явцыг хэрхэн зохицуулахаас хамаарахыг онцолж байна.

Бодлого боловсруулагчид бэлтгэлээ сайн хангаж, COVID-19-ийг Үл тэвчих бодлогыг шат дараатай сулруулж чадвал БНХАУ-ын эдийн  засаг 4-5.3 хувиар өсөх боломжтой гэж шинжээчид тооцоолжээ.

БНХАУ-ын дээд албан тушаалтнууд ирэх оны эдийн засгийн өсөлтийн зорилтыг таван хувиар тогтоох  эсвэл өсгөх асуудлыг хэлэлцэж байгааг эх сурвалж мэдээлсэн байна.

“Bloomberg”-ийн судалгаанд хамрагдсан эдийн засагчид ирэх онд БНХАУ-ын дотоодын нийт бүтээдэгдэхүүний өсөлт 4.8 хувь байна гэж тооцоолж байгаа аж.

Үүнээс гадна Бээжин цар тахлын бодлогоо сулруулах арга хэмжээ авч байгаагаас БНХАУ-ын компаниудын хувьцаануудын ханш өсөлтөөрөө хөгжиж буй орнуудын хувьцаануудыг тэргүүлнэ гэж “Morgan Stanley” тооцоолжээ.