ХБНГУ-ын Шударга өрсөлдөөнийг зохицуулагч байгууллага “PayPal” компанийг үнийн өрсөлдөөнийг хязгаарласан хэргээр шалгаж байна.

Тодруулбал: “PayPal”-ийн гэрээний нөхцөлд хэрэглэгч өөр төлбөр тооцооны үйлчилгээг ашиглаж байгаа тохиолдолд бизнесүүдийг бүтээгдэхүүн, үйлчилгээгээ илүү хямд үнээр санал болгохыг хориглодог. Мөн бизнесүүдийг “PayPal”-аас өөр төлбөрийн арга хэрэгсэл ашиглах боломжийг нэмэгдүүлэхийг хориглодог ажээ. Ингэснээр цахим бизнес эрхлэгчид “PayPal”-аас хамааралтай болж байна гэж албаныхан үзэж байгаа юм.

Германы Шударга өрсөлдөөнийг зохицуулагч байгууллага “Amazon”, “Meta”, “Google”, “Apple” зэрэг томоохон технологийн компаниудыг монополын хэргээр мөн шалгаж байгаа аж. Хамгийн сүүлд “Google” компанид хэрэглэгчдийн дата мэдээллийн нөхцөлийн асуудлаар анхааруулга явуулсан байна. “PayPal” компанийн бизнесүүдэд тавих шаардлагын улмаас шинэ төлбөр тооцооны компаниуд үнийн хувьд өрсөлдөж чадахгүй байгааг тус байгууллага онцолж байгаа юм.