Австралийн Хөрөнгийн биржид бүртгэлтэй "Azzuro Resources" компани Говь-Алтай аймагт орших “Майхан уул” зэс-алтны төсөл, “Ямбат” зэс-никель-цагаан алтны бүлгийн металлуудын төслийнхөө хайгуул, өрөмдлөгийн ажлыг эрчимтэй үргэлжлүүлж байгаагаа хөрөнгө оруулагчдад танилцуулсныг “Mongolian Mining Journal” мэдээллээ. Тухайлбал: “Ямбат” ордод туршилтын өрөмдлөгөөр зэс, никелийн өндөр агуулгатай хүдэржилт баталгаажсан бөгөөд металл авалтын түвшин 90 гаруй хувьтай гарсан нь төслийн эдийн засгийн өгөөж асар өндөр байхыг харуулж байна.

Харин “Майхан уул” төслийн хувьд зэс-алтны VMS эрдэсжилт болон өнгөн хэсгийн алтны баялаг агуулга илэрч, өрөмдлөгийн ажлууд гүний чиглэлд амжилттай үргэлжилж буйг дурдлаа.

Мөн "Kerry Mining Group"-ээс гурван сая гаруй австрали долларын шинэ хөрөнгө оруулалт татсанаар компанийн санхүүгийн чадамж бэхжиж, хайгуулын дараагийн шатны томоохон хөтөлбөрүүд саадгүй санхүүжих баталгаатай болсныг тодотгосон байна.

“Azzuro Resources” 2027 оны эхний хагаст багтаан эдгээр төслүүдийн анхны олон улсын JORC стандартын дагуух таамагласан нөөцийн тайлан болон урьдчилсан эдийн засгийн үнэлгээг шинжээчдэд танилцуулахаар төлөвлөн ажиллаж буйг “Mongolian Mining Journal” мэдээллээ.