2024 оны УИХ-ын сонгуулийн явцын зардал урьдчилсан дүнгээр 66.6 тэрбум төгрөг болсныг Үндэсний аудитын газрын тайланд үндэслэн “Бодлогод залуусын хяналт” ТББ танилцууллаа. Үндэсний аудитын газар хандивын дансаа бүртгүүлсэн 787 нэр дэвшигч, 14 нам эвсэл нийт 87.5 тэрбум төгрөгийн орлого төвлөрүүлсэн байна. Улаанбаатар хотын зургаан тойрогт 17 орчим тэрбум төгрөгийн орлого бүрдүүлснээс 13 тэрбум төгрөг, харин үлдсэн 45 тэрбум төгрөгийг орон нутгийн долоон тойрогт зарцуулжээ.

Нам, эвслээр нь задлаад харвал

• МАН-ын 76 нэр дэвшигч 41 тэрбум гаруй төгрөгийн орлого бүрдүүлснээс 29.6 тэрбум төгрөг
• АН-ын 73 нэр дэвшигч 26.2 тэрбум гаруй төгрөгийн орлого бүрдүүлснээс 21.7 тэрбум төгрөг
• ХҮН намын 74 нэр дэвшигч 3.2 тэрбум гаруй төгрөгийн орлого бүрдүүлснээс 2.3 тэрбум төгрөг
• Үндэсний эвслийн 41 нэр дэвшигч 2.9 тэрбум гаруй төгрөгийн орлого бүрдүүлснээс 2.3 тэрбум төгрөг
• Иргэний зориг ногоон намын 12 нэр дэвшигч 577 сая гаруй төгрөгийн орлого бүрдүүлснээс  525 сая төгрөгийг сонгуулийн явцад зарцуулжээ.

Зарим нам, эвсэл, нэр дэвшигчийн орлогын үлдэгдэл харьцангуй өндөр байгаа нь цаашид сонгуулийн хандивын эрх зүйн зохицуулалтыг боловсронгуй болгох шаардлагатайг иргэний нийгмийн байгууллагууд онцоллоо.