Дэлхийн эдийн засаг 2024 онд 2.7 хувиар өсөх төлөвтэй байгааг “Bloomberg Intelligence” тооцоолсон байна. Энэ нь 2023 оны 3.1 хувийн өсөлтөөс буурсан үзүүлэлт болж байгаа бөгөөд 2009 оны дэлхийн санхүүгийн хямрал болон 2020 цар тахлын үеийг хасаж тооцвол 2001 оны "дотком"-ын хөөсрөлтөөс хойших эдийн засгийн өсөлтийн хамгийн удаан түвшин боллоо. Тодруулбал: 2024 онд хөгжингүй орнуудын эдийн засаг 0.9 хувийн өсөлттэй байх бол хөгжиж буй орнууд 4.1 хувийн өсөлттэй байхаар байна. Үүнээс гадна дэлхийн инфляц 2024 оны эцэст 5.4 хувь хүрэхээр байгаа аж.

Харин АНУ, Европын Холбоо болон Их Британид инфляц 2024 онд зорилтод нь хүрэхээр байна. Өөрөөр хэлбэл 2024 онд хөгжингүй орнуудад үнийн өсөлт дунджаар 2.6 хувьтай байхаар байгаа нь 2022 оны толгой өвтгөм 7.4 хувь болон 2023 оны 4.8 хувиас буурсан үзүүлэлт юм.

Түүнчлэн хөгжиж буй орнуудын хувьд инфляц янз бүрийн түвшинд байхаар байна. Жишээ нь:  БНХАУ-ын хувьд дефляцын дарамт улам нэмэгдэхээр байгаа аж. Харин Аргентин улсад эсрэгээрээ үнийн өсөлт 200 хувь даваад байгаа юм. Ерөнхийдөө дэлхийн хэмжээнд цар тахлын дараах инфляц хурдан өссөн шигээ хурдан буурч байна гэж дүгнэн хэлж болохоор байна.