Аравдугаар сард АНУ-ын жижиглэн худалдааны салбарын орлого өмнөх сараас 0.1 хувиар буурлаа. Тус улсын жижиглэн худалдааны борлуулалт наймдугаар болон есдүгээр сард дараалан өсөөд байсан юм.

Харин өнгөрсөн сард үйлдвэрлэгчийн үнийн индекс 0.5 хувиар буурсан нь 2020 оны дөрөвдүгээр сараас хойших хамгийн өндөр дүнгээр унасан үзүүлэлт болсныг АНУ-ын Засгийн газрын тайланд дурджээ. Үүнд газрын тосны  үнэ буурсан нь голлон нөлөөлсөн гэж үзэж байна.

Дээрх тайланг танилцуулахаас өмнө АНУ-ын инфляцын өсөлт ерөнхийдөө удааширч байгааг лхагва гарагт мэдээлсэн юм.

Мөн АНУ-ын ажлын байрны өсөлт саарч байгаа нь эдийн засаг зөөлөн газардах боломжтой байгааг харуулж байна.

Дотоодын нийт бүтээгдэхүүнийг тооцоолоход ашигладаг жижиглэнгийн хяналтын бүлгийн борлуулалт есдүгээр сард 0.7 хувиар, аравдугаар сард 0.2 хувиар өсжээ. Энэ нь III улиралд зардал өссөн ч нөгөө талдаа IV улирлын эдийн засаг хэвийн эхэлж байгааг харуулж байна.