Нүүрсний хэрэглээ тооцооллоос давж эрс багассан нь 2023 онд ХБНГУ-ын нүүрстөрөгчийн давхар ислийн ялгарал сүүлийн 70 жилийн доод түвшинд хүрч буурахад нөлөөлснийг “Agora Energiewende” сүүлийн тайландаа онцолжээ. Тодруулбал: тус улсын нүүрсний цахилгаан станцуудын эрчим хүч үйлдвэрлэл 1960-аад оноос хойших доод түвшинд хүрч, дангаараа 44 сая тонн CO2 агаар мандалд ялгарахаас сэргийлсэн байна.

Герман улсын нүүрстөрөгчийн давхар ислийн ялгарал өнгөрсөн онд 673 сая тонн байсан нь жишиг он болох 1990 онтой харьцуулахад 46 хувиар буурсан үзүүлэлт болжээ. Энэ нь мөн тус улсын Уур амьсгалын хамгааллын тухай хуульд заасан нүүрстөрөгчийн давхар ислийн ялгарлын хэмжээг жилийн 722 сая тонноос хэтрүүлэхгүй байх зорилтыг биелүүлсэн гэсэн үг болж байна.