Зургийг: David Paul Morris/Bloomberg
Олон улсын автомашины засвар үйлчилгээний зах зээл 2023 онд 770.7 тэрбум ам.доллароор хэмжигдэж байсан бол 2030 он гэхэд 1.3 орчим их наяд ам.доллароор хэмжигдэнэ гэж “Coherent Market” судалгааны байгууллага мэдээллээ.
Монгол Улсын хувьд импортын автомашины дийлэнхийг буюу оны эхний найман сарын байдлаар 93.4 хувийг Япон улсаас татан авч байна. Энэ нь өнгөрсөн оны мөн үеэс 50 гаруй хувиар өссөн үзүүлэлт боллоо.
“Японы “Toyota”-ийн автомашины засварын үйлчилгээ үзүүлдэг хувь хүн, албан байгууллагууд олон байдаг ч яг стандартын дагуу чанартай үйлчилгээ үзүүлдэг газрууд харьцангуй цөөн байгаа”-г Япон улсаас Монгол Улсад суугаа Онц бөгөөд бүрэн эрхт Элчин сайд Игавахара Масарү тодотгов. Иймд энэ чиглэлд мэргэжилтнүүд бэлтгэх нь чухал ач холбогдолтойд тооцогдож байгаа юм.
Сүүлийн байдлаар Шинжлэх ухаан технологийн их сургууль “Toyota” компанийн техникийн сургалтын хөтөлбөрийг Монгол Улсад албан ёсоор хэрэгжүүлэхээр болсон байна. Ингэснээр “Toyota”-ийн автомашиныг аюулгүй найдвартай хэрэглэхэд инженер техникийн ажилтнуудын суурь мэдлэг, ур чадвар дээшилнэ гэж үзэж байгаа аж.