БНХАУ-ын зээлийн эрэлт нэмэгдэж, дефляцийн дарамт буурсныг сүүлд танилцуулсан статистик мэдээлэл илтгэж байна. Үүний зэрэгцээ юанийн ханш өссөн нь эдийн засаг, санхүүгийн зах зээл огцом уналтын дараа тогтворжиж магадгүй гэсэн дохио болж буй аж.

Наймдугаар сард БНХАУ-ын арилжааны банкнууд 1.36 их наяд юань буюу 186.18 тэрбум ам.долларын зээл шинээр олгосон талаар тус улсын Төв банк мэдээллээ. Энэ нь өмнөх сараас бараг дөрөв дахин өссөн үзүүлэлт бөгөөд шинжээчдийн таамгаас давсан үзүүлэлт боллоо.

Тус улсын бодлого зохицуулагчид үл хөдлөх хөрөнгийн салбарт дэмжлэг олгохоор моргейжийн зээлийн эрэлтийг нэмэгдүүлэх чиглэлд арга хэмжээ танилцуулсан юм. Ингэснээр орон сууцны зээлийн эрэлт нэмэгдсэнээс гадна аж ахуйн нэгжид олгох зээл нэмэгджээ.

“Бодлогын арга хэмжээний нөлөөллөөр эдийн засагт тогтвортой байдал нэмэгдсэн тул зээлийн өсөлт эрчимжсэн” гэж “Pinpoint Asset Management”-ийн шинжээчид мэдээллээ.

Орон сууцны зээлийг оролцуулан тооцвол наймдугаар сард өрхийн зээл 392.2 тэрбум юань болж өссөн байна. Өмнөх сард 200.7 тэрбум юаниар буурч байсантай харьцуулахад энэ өндөр дүнгээр өссөн үзүүлэлт боллоо. Харин аж ахуйн нэгжид олгосон зээл 948.8 тэрбум юань болж, өмнөх сараас дөрөв дахин  өссөн байна.