"Их-7"-ийн бүлэг шатах түлшний хэрэглээг үе шаттайгаар бууруулах талаар тохиролцоонд хүрэхэд ойрхон байгаа хэдий ч  нүүрсийг хэрэглээг халах хугацаан дээр нэгдсэн саналд хүрээгүй тухай Францын Эрчим хүчний сайд Агнес Паннье-Рунашер мэдээллээ. Японы хойд хэсгийн Саппоро хотод "Их-7"-ийн гишүүн орнуудын Байгаль орчин, Эрчим хүчний сайд нарын уулзалт ням гарагт өндөрлөсөн байна. Уулзалтаар гишүүн орнуудын төлөөлөл хөгжиж буй орнуудад дэлхий дахины эрчим хүний шилжилтэд оролцоход нь туслалцаа үзүүлэх албан ёсны мэдэгдэл гаргах талд хэлэлцжээ.

“Анх удаа “Их 7”-ийн бүлэг шатах түлшний хэрэглээг багасгах явдлыг түргэсгэх шаардлагатайг онцлон ярилцлаа. Гэвч бид анх тохиролцсоны дагуу 2030 он гэхэд нүүрсний хэрэглээг бүрэн зогсоох амлалтдаа хүрч чадах эсэх дээр санал нийлсэнгүй” хэмээн Паннье-Рунашер бямба гарагт мэдээлсэн байна.

"Их-7"-ийн бүлгийн сэргээгдэх эрчим хүчний хэрэглээг дэмжих төлөвлөгөөний хүрээнд нарны эрчим хүчний хэрэглээг гурав дахин, гишүүн улсууд дахь салхин паркийн тоог 2030 он гэхэд 2021 оныхоос долоо дахин нэмэгдүүлэхээр тусгажээ.

Мөн гишүүн орнууд 7.5 тэрбум ам.долларыг лити, никель зэрэг чухал ашигт малтмалын хангамжийг нэмэгдүүлэхэд чиглүүлж зарцуулахаар төлөвлөж байгаа ба  ногоон технологид зориулсан байгалийн баялгийг хамгаалалтдаа авах асуудал мөн тухайн уулзалтын үеэр яригдсан гэж "NHK" баасан гарагт мэдээлжээ.

Энэхүү Саппород болсон уулзалт нь урьдчилсан уулзалт бөгөөд ирэх сард Ерөнхий сайд Фүмио Кишида “Их-7”-ийн  албан ёсны уулзалтыг Хирошимад зохион байгуулах юм.