Дэлхийн банк болон Засгийн газрын хамтарсан тооцооллоор иргэдийн амьжиргааны өртөг 10 хувиар өсөхөд ядуурлын түвшин 34.3 хувь хүрч, 211 мянган хүн ядуусын эгнээнд шилжих эрсдэлтэй гэж үзсэн байна.

Зөвхөн Монгол Улсад төдийгүй олон улсад сорилт дагуулж буй үнийн өсөлтийн дарамтыг бууруулах таван үндсэн чиг үүрэг бүхий УИХ-ын ажлын хэсэг байгуулагдсан болохыг УИХ-ын дарга Г.Занданшатар мэдэгдлээ.

Монгол Улсын инфляц сүүлийн 10 жилийн дээд түвшинд хүрч, тавдугаар сард улсын хэмжээнд 15.1 хувьтай, Улаанбаатар хотод 16.2 хувьтай гарсан юм. Цаашид 2022 оны эцэст инфляц хамгийн өндөр түвшинд хүрэх магадлалтай бөгөөд одоогоор бүс нутагтаа хамгийн өндөрт тооцогдож байна.

Инфляцын шалтгааныг нийлүүлэлт талаас нь харвал шатахууны үнэ өмнөх оны мөн үеэс 1.6 дахин нэмэгдсэнээс гадна хүнсний гол нэрийн бараа, бүтээгдэхүүний үнэ хамгийн багадаа 26 хувиар, ихдээ 2.5 дахин өсөөд байна.

Үүнтэй холбоотойгоор УИХ-аас байгуулагдсан ажлын хэсэг гол нэрийн бараа бүтээгдэхүүний үнийн өсөлт, хомсдолоос сэргийлэх, мөнгөний болон төсвийн бодлогын хүрээнд дүгнэлт хийх, эрэлтийн гаралтай инфляцыг өдөөхгүй байх чиглэлд судлах, төсвийн хэмнэлт, халамжийн бодлогод дүгнэлт хийх арга хэмжээ авахаар болжээ.

Олон Улсын Валютын Сангийн зүгээс Монгол Улсын халамжийн бодлогыг зөвхөн зорилтот бүлэгт чиглүүлэх, төсвийн зарцуулалтыг үр дүнтэй байлгахыг удаа дараа анхааруулж байгаа юм.

З.Энхболор

Холбоо барих: enkhbolor.z@bloombergtvmongolia.com

minjma.g@bloombergtvmongolia.com