Таван жилийн дараа Хонгконгт айлчилж буй БНХАУ-ын Ерөнхийлөгч Ши Жиньпин "Хонгконг галаас эргэн сэргэж, "дахин төрсөн". “Нэг улс, хоёр систем бодлого амин чухал” гэдгийг бодитоор харлаа” гэж мэдэгдлээ.

Тэрбээр Хонгконг Их Британиас БНХАУ-ын мэдэлд шилжсэний 25 жилийн ойн баярын хүрээнд айлчилж байгаа аж. Энэ нь Ши Жиньпиний хувьд цар тахал эхэлснээс хойш бараг 900 хоногийн дараа гадаад айлчлал болж байгаа юм. Ши Жиньпин Хонгконгийн захирагч асан Кэрри Лам болон түүний залгамжлагч Жон Литэй уулзсан байна.

"Нэг улс, Хоёр систем" бодлогын хүрээнд БНХАУ Хонгконгийн ардчилсан институтийг 50 жил хадгалах амлалт өгсөн юм. Түүнээс хойш 25 жилийн хугацаа өнгөрөөд байна.

БНХАУ-ын Ерөнхийлөгч Ши Жиньпин
“Сүүлд Хонгконгт ирснээс хойш таван жил өнгөрсөн байна. Энэ таван жилийн хугацаанд Хонгконгийн хөгжил дэвшлийг ажиглаж, Хонгконгийн талаар бодсоор байлаа. Би болоод БНХАУ-ын Засгийн газар Хонгконгийн иргэдтэй сэтгэл зүрхээрээ хамт байгаа. Сүүлийн үед Хонгконг ээлж дараалсан олон асуудлыг даван туулж, удаа дараагийн сорилтыг даван гарсан. Шуурганы дараа Хонгконг галаас эргэн сэргэж, дахин төрсөн. (Хонгконг) тэнхээтэй гэдгээ харуулж байна. “Нэг улс, хоёр систем бодлого амин чухал” гэдгийг бодитоор харлаа. Энэ бодлого Хонгконгийн хөгжил цэцэглэлт, тогтвортой байдал, мөн Хонгконгийн эх орон нэгтнүүдийн маань аюулгүй байдал, сайн сайхныг урт хугацаанд хангана. Нэг улс, хоёр систем бол сайн бодлого” гэж мэдэгдлээ.

Э.Мишээлт

Холбоо барих: misheelt.e@bloombergtvmongolia.com

minjma.g@bloombergtvmongolia.com