“Yum Brands”-ийн ашиг дөрөвдүгээр улиралд буурсан ч шинжээчдийн хүлээлтийг давсан үзүүлэлттэй гарсан байна. “КFC” болон “Taco Bell” зэрэг түргэн хоолны сүлжээ газруудыг эзэмшдэг тус компанийн цэвэр ашиг нэг жилийн өмнөхөөс 4.7 хувиар буурч, 321 сая ам.долларт хүрчээ. Энэ нь нэгж хувьцаанаас 70 центийн ашиг олсон гэсэн үг юм. Гэхдээ зарим төрлийн бүтээгдэхүүнийг тооцоогүй дүнгээр, нэгж хувьцаанд ногдох цэвэр ашиг нь 86 цент байжээ. Шинжээчид энэхүү үзүүлэлтийг 79 цент гарна гэсэн хүлээлттэй байсан байна. Харин тус компанийн борлуулалт 0.6 хувиар өсч, 4.18 тэрбум ам.долларт хүрсэн нь шинжээчдийн хүлээлтэд хүрсэнгүй. “Yum Brands” БНХАУ дахь борлуулалтаа нэмэгдүүлэхэд бэрхшээлтэй байсан ч тус компани бусад хөгжиж байгаа орнуудад илүүтэй анхаарч эхэлсэн байна. Мөн ОХУ, Франц зэрэг улс дахь борлуулалтаа нэмэгдүүлсэн нь санхүүгийн үзүүлэлтэд тусгалаа олжээ. Зарим төрлийн бүтээгдэхүүний борлуулалтыг тооцоогүй байдлаар бүтэн жилийн ашиг нь хамгийн багаар бодоход 20 хувиар өснө гэж таамаглаж байгаагаа тус компанийн зүгээс мэдэгдсэн байна. 

Б.Дуламхорлоо 

Холбоо барих: dulamkhorloo.b@bloombergtvmongolia.com 

minjma.g@bloombergtvmongolia.com