Жижиглэн худалдааны хамгийн том сүлжээ дэлгүүрийн “Wal-Mart” компани хүргэлт үйлчилгээндээ дрон ашиглахаар АНУ-ын Холбооны Нисэхийн газарт хүсэлт гаргалаа. Ингэснээр тус компани “Amazon”, “Google” компаниудтай өрсөлдөхөөр зэхэж байна. “Wal-Mart” нь дроны хэрэглээг өөрийн байгууламж дотор туршиж эхлээд байгаа аж. Харин одоо хүргэлтийн үр бүтээмжит байдал болон үйлчилгээний чанарыг сайжруулахын тулд гадаад орчинд ашиглах шаардлагатай байгааг албан хүсэлтдээ дурджээ. Хууль эрх зүйн үүднээс АНУ-д арилжааны зориулалтаар дрон ашиглах боломжгүй. Гэхдээ Холбооны Нисэхийн газарт хүсэлт тавьснаар тусгай зөвшөөрөл авах боломж байдаг байна. Одоогоор 2000 гаруй байгууллага энэ зарчмаар дрон ашиглалтын эрх аваад байгаа ажээ. “Walm-Mart” компанийн ашгийн өсөлт удааширч, улмаар ирэх онд 12 хувиар буурах урьдчилсан тооцоо гарсан байна. Тиймээс тус компанийн удирдлагууд үр бүтээмжит байдлыг нэмэгдүүлснээр санхүүгийн үзүүлэлтээ сайжруулах зорилт тавьжээ.

Э.Эрдэнэтуяа

Холбоо барих: erdenetuya.e@bloombergtvmongolia.com

minjma.g@bloombergtvmongolia.com